【2008-01-30/ 東方日報專訊】
港台烏煙瘴氣，窮途末路，政府早前放風即將推出公共廣播諮詢，建議成立一間新公共廣播機構取代港台，兩年後讓港台自然死亡。點知，就喺大家以為港台行將就木、神仙難救之際，突然有人高喊刀下留人！
要救港台一命嘅係邊個？咪就係煲呔曾特首咯！煲呔早前聲稱，由於近期出現民間電台訴訟，政府需要押後推出有關公共廣播嘅諮詢報告，即係殺港台政策可能有變。尋日喺立法會上，議員要求政府不應拖延諮詢，有官員出嚟為煲呔解畫，指政府會就廣播發牌機制及香港電台頻譜有效使用方面作出研究，需要較長時間，小心處理公共廣播諮詢。有關官員仲好體貼咁安慰港台員工，話理解佢哋對個人及港台前途嘅憂慮，希望佢哋一如既往，堅守崗位！
一時聲色俱厲要殺港台，一時又騰雞放低把刀，政府前後矛盾，到底想做乜？好簡單，迫於民意壓力，政府唔處理港台唔得，但又唔夠膽，於是就整套大龍鳳出嚟，搞乜嘢諮詢報告欺騙市民，所謂涉及民間電台訴訟呀、要畀多啲時間小心處理呀，統統係藉口，目的就係想拖得就拖！
禍福無門，唯人自召，港台落到今日嘅田地，全係咎由自取。咁多年來，港台食碗面反碗底，為港英餘孽、漢奸走狗提供平台，同淫賤黎沆瀣一氣，有破壞冇建設，早已臭名遠揚。港台上下自以為係獨立王國，無法無天，胡作非為，前廣播處長朱培慶手拖艷女被媒體當街斷正，醜態百出，話口未完，助理廣播處長張文新又醉駕炒車，狼狽不堪。上樑不正下樑歪，港台ＤＪ、節目主任紛紛被揭發詐騙公帑，又有主持人食完百萬元肥雞餐再翻閹，齊齊搵着數。
港台醜聞好似三水佬睇走馬燈咁，陸續有嚟。無數事實證明，港台已經爛皮爛骨，腐朽透頂。好似一個人生毒瘡，化膿流血，臭不可聞，正常人都會搵醫生一刀割咗佢，以免病入膏肓。點知政府竟然怕痛，諱疾忌醫，不敢面對問題，不願痛下殺手！政府拖得就拖，遲早爆出更大鑊嘢出嚟，到時就唔衰攞嚟衰！
話時話，香港資訊發達，電台、電視台、報刊、雜誌應有盡有，政治立場各有不同，極其多元化。早前煲呔到廣州拜會新任省委書記汪洋，汪洋問起香港有幾多家媒體，煲呔答稱有三十多家。區區七百萬人口，有三十多家媒體，比率之高可謂全球罕見。既然港台自取滅亡，咪順水推舟送佢上路咯，反正佢已經冇乜存在價值。點知政府又多此一舉，推出乜鬼公共廣播諮詢，要讓港台借屍還魂！
講真，如果連小小港台都搞唔掂，煲呔仲夠膽話強政勵治？當斷不斷，必受其亂，計功夫茶話齋，政府應該快快趣趣摺埋呢個作反電台，一年慳番四億幾公帑，用來提高老人生果金都好呀！
